泰妃雞 (銅鑼灣)

2月25日, 今日漫無目的地喺銅鑼灣搵食, 求其地中咗上嚟呢間泰妃雞~ 記得之前都食過佢其他分店, 佢每日都會推出一兩款$15泰式湯粉, 都算幾抵食~ 不過今晚突然想食咖哩, 所以佢呢度主打嘅海南雞同平爆嘅湯粉都無叫到, 主力食飯! 點知… 咁就出事喇…

::: 沙嗲串燒 ::: $58 (半打)
心血來潮又想試下呢度d沙嗲串燒. 觀乎半打都唔洗$60, 又可以每款任揀, 於是每樣串燒都要咗一串~ 分別係豬、牛、羊、雞腎、雞軟骨同司華力腸~ 奇怪呢度有雞腎雞軟骨但就偏偏無雞肉… anyway, 半打雜錦串燒好快就一次過上晒, 每串份量都好大, 形成一個大堆頭串燒拼盤! 當中最好味嘅係司華力腸~ 大大碌界埋花方便醬汁入味~ 正! 肉類方面牛肉唔錯, 啖啖肉夠juicy. 不過豬肉就有少少乾, 仲食到有朕油臆加臊臭味… 個羊呢就燒得太乾肉質亦太瘦, 勁柴皮! 其餘嘅雞腎同雞軟骨到有少少油臆味… 顯然全部串燒都應該係一早燒好兼擺咗一段時間… 唔怪之得咁平啦…::: 甜咖哩羊腩飯 + 凍奶茶 ::: $45
呢個甜咖哩睇樣都知佢一d都唔辣! 帶有濃膩奶香嘅咖哩有少少似馬來咖哩, 但可能因為落咗好多洋蔥, 又比馬來咖哩甜好多~ 羊腩炆得老咗d, 肉質都係硬硬韌韌咁… 唔算好入味. 不過最大鑊一定係個白飯! 硬都呀媽都唔認得! 絕對唔係隔過夜嗰隻硬法, 反而更似係未煮熟嘅半生熟米咁! 好在都叫有d咖哩汁撈下先叫做無咁乾硬… 仲要啖啖都要認真細嚼慢咽, 以防食完胃痛!
凍奶茶夠晒大杯~ 茶味濃但有少澀, 奶比例都唔錯. 其實成杯野味道ok~ 但飲完感覺好漏… 飽到咩咁…::: 泰式豬髀飯 + 凍檸茶 ::: $45
豬髀飯同海南雞飯都係泰國野裏面唔少得嘅兩款常見菜式, 但係要整得好食又真係唔容易~ 呢個泰式豬髀飯上到枱已經見到佢嘅特色唔多, 先係個汁好稀好似湯咁, 搞到個飯好以湯飯, 呢個時候都仲未知d飯硬到爆… 豬髀嘅肥位尚ok, 但係瘦肉部份好實好韌, 好似煲完湯嗰舊瘦肉咁, 而且絕對係唔新鮮嘅… 咸菜亦只係似早早預備一大盤, 要用到先筆起, 所以凍冰冰… 而食過其他地方嘅都仲會有少少椰菜, 再加半隻蛋, 呢碟飯真係一無是處, 加埋d硬飯, 仲要冇辣汁點豬髀, 非常失望…
凍檸茶中規中矩, 茶味濃而澀, 檸檬冇乜味.呢間泰妃雞地方超大座位超多, 環境都算唔錯~ 不過地方大而人手不足亦會影響服務質素, 想話叫人拎d碟都好難… 雖然即使其實拉勻環境價格食物係算合格, 但今餐d飯真係硬到令人有消化不良嘅危險! 所以無計啦~ 唯有比個喊~

山地人越南法包專門店 (北角)

2月18日, 之前團購咗呢個山地人, 因為之前食過都覺得佢地嘅法包幾好食, 而家用$39就可以買到2個法包加野飮, 確實十分平~咁我地一定要買啦~ 座位雖然唔多, 但係大多數人嚟都係買外賣為主, 我地去到都即刻搵到位坐~ 團購餐只可以揀原味法包, 配豬肉或者牛肉, 我地就各選其一~

::: 豬肉原味法包 ::: $39
一個9吋長嘅法包, 新鮮熱辣送到我地面前, 烘過嘅法包暖暖地, 好脆口, 又唔會好硬, 食得出係新鮮貨~ 裏面嘅配料除咗有豬肉, 仲有札肉, 肝醬, 蘿蔔絲, 生菜洋蔥咁, 好豐富~ 加埋d魚露, 酸酸地咁個感覺好鮮, 亦都好開胃~ 啖啖都係肉, 加埋脆脆嘅法包, 好滿足~ 唯一要彈嘅係佢豬肉份量比較少, 多數肉都係札肉…

::: 牛肉原味法包 :::
其實2個法包個味道都差唔多, 因為同樣牛肉嘅份量唔多得過豬肉, 不過牛肉個味道會咸少少, 同個札肉味會有唔同~

唔駛$20一個下午茶, 份量足2個大家樂熱狗, 團購都係多荀野,下次有山地人團購一定要再買~

譚仔雲南米線 (觀塘)

2月17日, 米線專門店之中我最鐘意食嘅首推譚仔! 平時我地都無乜特別分三哥唔三哥嘅譚仔, 隨住分店越開越多, 就開始覺得唔同分店質素參差… 而呢間觀塘店, 就算係同行中比較好味嘅!

::: 墨丸小鍋米線 ::: $22
墨丸係我食親譚仔都一定會點嘅配料! 呢度d墨丸好香墨魚味, 質地彈牙~ 仲有好多粒~ 好正! 另外鐘意食譚仔嘅原因就係因為佢米線本身嘅配菜已經好多好豐富~ 唔洗另外追加已經附有大量韮菜、芽菜、腐皮, 比出面好多打正旗號話賣雲南米線但其實好似車仔麵咁嘅舖頭好好多! 而且呢度個湯底好夠味, 米線又夠煙韌彈牙~ 好味!::: 腩肉酸辣米線 + 凍奶茶 ::: $24 + $5
諗住腩肉會係滷過會有滷水色, 但係原來只係白烚, 所以成碗米線望落都幾淡… 腩肉有本身肉香, 半肥瘦狀態下肉地唔韌, 有少少肥仲可以增加番個香口感, 不過我都係鍾意食滷水多d. 酸辣湯底唔會好似其他雲南米線咁好多油, 清淡得嚟帶少少甘香酸辣味, 個酸度又唔會嗆喉, 唔錯~ 落配菜亦都唔會手軟, 大量芽菜、韮菜、腐皮啖啖有~
凍奶茶普通貨色, 其實唔算難飲~ 不過奶味好重, 飲完有d膩. 勝在加$5就有, 奶茶亦都可以襯番酸辣米線, 正~呢度長期都要等位, 但人流算係運行得快. d呀姐做野都係快手快腳嘅, 所以服務其實就唔好expect會好好, 個墨丸米線亦催咗幾次先有. 不過價錢平、味道好, 真係已經好過好多其他米線舖~ 不過到寫食評嘅時候發現佢已經搬咗舖... 唯有希望佢嘅品質越搬越好啦!

清亭．燕萍 (銅鑼灣)

2月15日, 得知清亭因為租約問題做到2月尾就會結業, 佢擁有我地十多年嚟好多唔同嘅回憶, 包括我同呀菲第一次一齊食嘅越南菜~ 今日特登嚟食埋最後一次, 同佢講聲拜拜~

::: 牛油雞翼 ::: $45
最好食嘅首選一定係牛油雞翼, 雖然牛油雞翼其實並唔係越南嘅出名菜, 不過呢度又真係做得幾好食~ 2隻雞全翼大大隻, 一上枱就傳嚟陣陣嘅蒜香~ 要講佢必食嘅原因, 就係佢嘅黃金炸皮, 炸過嘅外皮好香牛油味, 炸皮又唔會同雞皮炸到分開晒, 雞肉十分熱辣辣, 肉質仲好嫩滑, 加埋青檸汁同少少淮鹽, 酸酸地咸咸地咁更加豐富味道~ 作為開胃小食, 完全會令人胃口大開!

::: 豬肉蝦檬卷 ::: $38
再叫個越南名菜檬卷, 樣就十分正宗, 粉卷包住大大隻嘅蝦, 豬肉同檬粉, 睇上去真係好豐滿~ 再加上一條韮菜, 真係好地道越南檬卷賣相~ 粉皮好黏口, 亦都夠晒薄, 檬粉香滑爽口, 有彈牙感~ 蝦呢, 雖然唔算係新鮮, 但係幾大隻, 肉地唔係彈牙過得去啦. 豬肉反而少咗d, 味道亦都冇乜, 俾其他野蓋住咗個味道. 而檬卷精髓就係個醬, 有dd似沙爹醬, 但係味道偏甜冇辣味, 點埋一齊食會令檬粉粉皮呢d淡淡地嘅野加番d味~ 如果個醬有花生粒蘿蔔粒會仲好~

::: 椰肉海鮮炒檬 ::: $70
海鮮主要材料都只係蝦仁同魷魚, 其實魷魚同椰肉都幾似, 所以成日會食錯~ 成個炒檬都好重椰子味, 鍾意椰子嘅人一定會好鍾意, 乾濕程度好適中, 因為檬粉炒得好乾身, 所以淋上個椰汁獻會好入味, 見個汁杰杰地, 但係又唔會漏~ 魷魚幾彈牙, 加埋椰汁亦都好夾, 整體做到好平均, 每一環都好適中, 係價錢貴咗d.

::: 越南蒸餾雪啡奶 ::: $30
呢個滴滴咖啡正宗地好濃縮, 一杯espresso咁多嘅咖啡加埋煉奶, 主要係靠d冰去等佢融嚟溝稀杯咖啡, 最初飲個甜味已經出晒嚟, 仲可能會覺得太濃, 慢慢等d冰融晒冰水溝埋嚟飲先係正宗~ 只係覺得煉奶唔夠多, 冇咗越南咖啡獨有嘅奶香, 以致啡味重咗少少.

由以前喺景隆街多人到成日要等位, 仲要坐喺後巷食, 之後擴充到呢度咁大地方, 開頭都要等位, 慢慢少咗人嚟食, 到今晚我地嚟都只係坐咗1/3滿, 有部份仲冇開燈慳電~ 都感覺到佢嘅質素下降咗, 價錢都加咗好多, 要結業都可能係迫不得已. 寫食評嘅時間聽講佢改咗名又係開番越南野, 但係已經唔再係清亭, 一切都變了.

文華餅店 (中環)

2月14日, 情人節快樂~~~ *v*
為咗隆重其事我地婚後第一個甜甜情人節, 呀菲決定要喺屋企親自主理今晚嘅情人節大餐! 而呀比就負責甜品環節~ 當然亦要特別鳴謝Openrice早前送我地嘅文華餅店cash coupon! 我地又擺到就快過期先記得用…用嚟買今晚嘅甜品就perfect喇!

::: Guava and Banana Mousse ::: $39
平時我地都好少食生果味嘅cake, 特別係mousse cake! 因為呀菲唔鐘意食mousse又唔鐘意d製過嘅生果食品… 抱住一個求其試下嘅心態去食呢件餅, 反而又唔係咁反感咋喎! 成件餅都充滿住清新果香~ 番石榴mousse好軟好香, 仲保留咗d果肉沙沙地嘅質地~ 中間混入香蕉蓉, 令mousse口感更綿密. 成件餅果味甜得自然, 唔會過膩, 係清新之選~

::: Double Milk Chocolate Mousseline ::: $39
熱門甜物之一~ 對佢多少有d期待! 賣相精緻, 層層不同朱古力蛋糕層以外, 係一片誘人嘅朱古力, 蛋糕面更灑上金箔粒粒, 令甜餅更添瑰麗. 呢個Chocolate Mousseline質地比上一件Guava and Banana Mousse更實淨細密, 朱古力味濃重, 仲有榛子脆脆層豐富口感. 不過對我嚟講就覺得甜咗d 食完個口有d漿

::: American Cheesecake ::: $39
呀菲最愛的cheesecake, 亦貴為鎮店甜餅之American Cheesecake~ 賣相簡潔高雅, 面頭同樣地有一片誘人嘅朱古力, 不過更吸引人嘅絕對係朱古力下嘅一磚奶白色酸忌廉同淡黃色嘅芝士~ 雖然色澤偏淡, 但芝士味絕對係濃香有加! 呢款cheesecake無餅底, 但餅身質地厚實, 彷彿入到口中先開始慢慢融化, 令你可以更專心品嚐芝士嘅味道~ 整體芝士味係濃而不膩~ 非常好吃!久聞文華餅店糕餅皆精, 今日多得Openrice推波助瀾先有幸一試~ 雖未至於驚為天人, 但總算名不虛傳無失望! 當然亦要多謝呀比喺情人節正日為我衝鋒陷陣買來三件精緻甜點為我地嘅情人節大餐作個完美結局啦~ 下次有機會真係要親身再試埋d pastry同其他cake先得!